ஆர். முத்துக்குமார்

சென்னை புத்தகக் காட்சி 2012ல் நான் வாங்கிய புத்தகங்களைப் பற்றி எழுதவேண்டும் என்று நினைத்தேன். நாற்பத்து சொச்ச புத்தகங்கள் வாங்கினேன். வெறுமனே பெயர் பட்டியல் போடுவதைக் காட்டிலும் அவற்றின் உள்ளடக்கம் பற்றிய சில குறிப்புகளையும் இணைத்து எழுத நினைத்தேன்.

இந்த ஆண்டு நான் வாங்கிய புத்தகங்களில் சிலவற்றை நான் ஏற்கெனவே நூலகங்களில் வைத்து வாசித்திருக்கிறேன்.  அவற்றை இம்முறை வாங்கமுடிந்தது.  இப்போது பட்டியலும் சிறுகுறிப்பும்.

ஈ.வெ.கி. சம்பத்தின் பேச்சுகள் மற்றும் எழுத்துகள் அடங்கிய சம்பத் பேசுகிறேன் புத்தகம் கடந்த ஆண்டு வாங்கினேன். பேருந்தில் தவறிவிட்டது. இம்முறை மீண்டும் வாங்கினேன். அண்ணா எழுதிய எல்லோரும் இந்நாட்டு மன்னர் தொடர் கட்டுரையை விமரிசித்து சம்பத் எழுதிய அண்ணாவின் மன்னன் கட்டுரைதான் புத்தகத்தின் ஹைலைட். தமிழ் தேசிய கட்சியைத் தொடங்கிய அன்று சம்பத் ஆற்றிய உரையும் இடம்பெற்றுள்ளது. சம்பத்தின் சங்கநாதம் என்ற தலைப்பில் விரைவில் புத்தகம் ஒன்று வெளியாக இருக்கிறது என்பது கூடுதல் தகவல்.

ஓ.வி. அளகேசனின் வாழ்க்கையும் பணியும் என்ற புத்தகத்தை நூலகங்களில் வாசித்திருக்கிறேன். இம்முறை வாங்கிவிட்டேன். தமிழ்நாடு காங்கிரஸ் கட்சியின் முக்கியமான காலகட்டங்களைப் பற்றிய பதிவு இந்தப் புத்தகம். குறிப்பாக, எமர்ஜென்சியின்போது திமுக அரசு கலைக்கப்பட்டதை நியாயப்படுத்தி நாடாளுமன்றத்தில் அளகேசன் பேசிய பேச்சுகளை திமுகவினர் இப்போது படித்தாலும் கொந்தளித்துப் போவார்கள்.

மாணவர் திமுக வரலாறு. தோப்பூர் திருவேங்கடம் உள்ளிட்ட மூவர் தொகுத்த புத்தகம். மொழிப்போரில் ஈடுபட்ட மாணவர் தலைவர்கள், தொண்டர்கள் பலரைப் பற்றியும் தகவல்கள் இடம்பெற்றுள்ளன. இன்றைய அமைச்சர்கள், சட்டமன்ற, நாடாளுமன்ற உறுப்பினர்கள் பலரும் மாணவர் திமுகவில் இருந்து வந்தவர்கள்தான். இன்று காங்கிரஸ் கட்சியில் இருக்கும் எஸ்.ஆர். பாலசுப்ரமணியம் பற்றியும் இந்தப் புத்தகத்தில் தகவல்கள் இருக்கின்றன.

தியாகத்தின் பாதையில் திலீபனுடன் 12 நாட்கள். புத்தகக் காட்சியில் நான் வாங்கிய புத்தகங்களில் முக்கியமானது. உடனடியாகப் படித்துவிட்டேன். திலீபனுடன் பன்னிரண்டு நாள்களும் இருந்து, அவரைக் கவனித்துக் கொண்டிருந்த மு.வே.யோ. வாஞ்சிநாதன் எழுதிய புத்தகம். உருக்கமான பதிவு. தோழமை வெளியீடு.

சுயராஜ்யம் என்றொரு புத்தகம். எஸ்.எஸ். மாரிசாமி எழுதியது. ராஜாஜி, சுதந்தரா கட்சி, காமராஜர், கே ப்ளான் பற்றி பல முக்கியத் தகவல்கள் இருந்தன. மிகவும் அரதப்பழசான, விஷயகனமுள்ள புத்தகம்.

திராவிட இயக்கமும் காமராஜரும். கோபண்ணா எழுதிய புத்தகம். பெரியார், அண்ணா, கலைஞர், நெடுஞ்செழியன், அன்பழகன், எம்.ஜி.ஆர் உள்ளிட்ட திராவிட இயக்கத் தலைவர்கள் பலரும் வெவ்வேறு காலகட்டங்களில் காமராஜர் பற்றிப் பேசியதன் பதிவு. காமராஜர் பிறந்தநாள் விழாவில் காமராஜரே என் தலைவர்; அண்ணா என் வழிகாட்டி! என்று எம்.ஜி.ஆர் பேசியது திமுகவுக்குள் பலத்த சர்ச்சைகளைக் கிளப்பியது. அந்தப் பேச்சை முழுமையாகப் பதிவுசெய்திருக்கிறார் கோபண்ணா.

ஆட்டோ சங்கரின் மரண வாக்குமூலம். எம்.ஜி.ஆர் காலத்து அரசியல்வாதிகள் பலருடைய மறுபக்கத்தைச் சொல்லும் புத்தகம் என்று கேள்விப்பட்டிருக்கிறேன். தொடராக வெளியானபோது நான் படிக்கவில்லை. இம்முறை புத்தகத்தை வாங்கிப் புரட்டினேன். ஆட்டோ சங்கர் எழுதிய பல கடிதங்களை வெளியிட்டுள்ளனர். அதில் ஒரு கடிதம் நான் கேள்விப்பட்டதை உண்மையாக்கியது. இன்னும் படிக்கவில்லை. நக்கீரன் வெளியீடு.

ஜெ. ஜெயலலிதா – தலைமைத்துவத்தின் புதிய பரிமாணம். ஆராய்ச்சியாளராகவும் அதிமுக அபிமானியாகவும் இருக்கின்ற தாண்டவன் என்பவர் எழுதிய புத்தகம். அதிமுக பற்றி ஆங்கிலத்திலும் சில புத்தகங்களை இவர் எழுதியிருக்கிறார். அதிமுகவில் எம்.ஜி.ஆரின் இறுதிக்காலத்தில் நடந்த சம்பவங்கள் மற்றும் எம்.ஜி.ஆரின் மரணத்துக்குப் பிறகு ஜெயலலிதாவின் அரசியல் வாழ்வில் நடந்த சம்பவங்கள் பலவற்றையும் இந்தப் புத்தகம் தேதி வாரியாகப் பதிவுசெய்திருக்கிறது.

இவை தவிர, கோவை அ. அய்யாமுத்து எழுதிய எனது நினைவுகள், அவ்வை டி.கே. சண்முகத்தின் எனது நாடக வாழ்க்கை, கண்ணதாசனின் பேட்டிகள் தொகுப்பு, ம.பொ.சி எழுதிய புதிய தமிழகம் படைத்த வரலாறு,  விடுதலை ராஜேந்திரன் எழுதிய அரசியல் தரகர் சுப்பிரமணியன் சுவாமி மற்றும் விடுதலைப் புலிகள் மீதான அவதூறுகளுக்கு மறுப்பு என்ற இரண்டு புத்தகங்கள், கோல்வால்கரின் உரைத்தொகுப்பு, அ. இராமசாமி எழுதிய அண்ணாவின் மொழிக்கொள்கை என்று சில புத்தகங்களை வாங்கினேன்.

கார்ட்டூனாயனம் என்ற புத்தகம் என்னைக் கவர்ந்தது. அண்ணாவைப் பற்றி ஆங்கில, தமிழ் ஊடகங்கள் வெளியிட்ட கேலிச்சித்திரங்கள் மற்றும் கருத்துப்படங்களின் தொகுப்பு.  ட்ராட்ஸ்கி மருது உள்ளிட்ட மூவரின் தொகுப்பு. விலை ரூ 500/-. பட்ஜெட் எகிறிவிட்டதால் வாங்கமுடியவில்லை. விரைவில் வாங்கவேண்டும்!

ஏப்ரல் பதினாலு பூஜை வச்சுக்கலாம்’ என்றார் எம்.ஜி.ஆர். சுற்றி நின்ற அத்தனைபேருக்குமே ஆச்சரியம். ஒருவருக்கொருவர் பார்த்துக் கொண்டனர். அதை எம்.ஜி.ஆரும் பார்த்தார். ‘நான்தான் ஹீரோ; சீக்கிரம் கதையை ரெடி பண்ணுங்க. நீங்கதான் வசனமும் எழுதறீங்க’ என்று சொன்னபோது கவிஞர் வாலி கருங்கல் சிலைபோல நின்று கொண்டிருந்தார். எம்.ஜி.ஆருக்கு மிகவும் நெருக்கமான உளவுத் துறை அதிகாரி மோகன்தாஸுக்கு மயக்கம் வருவதுபோல இருந்தது.

என்ன ஆயிற்று இவருக்கு? தமிழ்நாட்டின் முதலமைச்சர். எத்தனை பெரிய பொறுப்புகள் நிறைந்த பதவி. சட்டம். ஒழுங்கு. மக்கள். பிரச்னை. திட்டங்கள். கோப்புகள். ரசிகர்கள். தொண்டர்கள். எத்தனை எத்தனை நெருக்கடிகள். எத்தனை எத்தனை பிரச்னைகள். எப்போது சறுக்குவார் என்று காத்துக்கொண்டிருக்கிறார் எதிர்க்கட்சித் தலைவர் கருணாநிதி. எல்லாவற்றையும் சமாளிக்கவேண்டும். மூச்சுவிடக்கூட நேரம் இல்லை. இருந்தும் நடிக்கிறேன் என்கிறாரே? என்ன மனிதர் இவர்? பதவிக்கு வந்த ஒரே ஆண்டில் (1978) அதிகாரம் அலுத்துவிட்டதா? நாற்காலி கசந்துவிட்டதா? சொடக்கு போடும் நேரத்தில் எதையும் சாதிக்கும் வித்தை தெரிந்தவர் எம்.ஜி.ஆர் என்பது வாஸ்தவம்தான். ஆனாலும் இது சாத்தியமா?

சாத்தியம்தான் என்று புன்னகை செய்தார் எம்.ஜி.ஆர். அந்தப் புன்னகையில் தெறித்து விழுந்த பொறி மற்றவர்களை ஆக்கிரமித்தது. கதை தயாரிக்கும் பணிகள் தொடங்கின. பத்து நாள்கள். கதை தயார் என்ற விவரத்தைத் தொலைபேசியில் சொன்னார் வாலி. நல்லது. அன்று இரவே வாலி வீட்டுக்கு வந்தார் எம்.ஜி.ஆரின் உறவினர் கே.என். குஞ்சப்பன்.

‘நாளைக் காலை ஆறு மணிக்கு முதலமைச்சருடன் நீங்கள் மதுரை செல்கிறீர்கள். விமானம் ஏற்பாடு செய்யப்பட்டுள்ளது. போகும் வழியில் முதலமைச்சரிடம் கதையைச் சொல்லிவிடுங்கள். காரியம் முடிந்ததும் நீங்கள் விமானத்திலேயே சென்னை திரும்பிவிடலாம்.’

ஆகாயத்தில் பறந்தபடியே வாலி சொன்ன கதையை எம்.ஜி.ஆர் கவனம் கலையாமல் கேட்டார். பிறகு சில திருத்தங்களைச் சொன்னார். படத்துக்கான தலைப்பை வாலியே சொன்னார்: ‘உன்னை விடமாட்டேன்!’

விடமாட்டார்கள் என்றார் மோகன்தாஸ். எதையும் முகத்துக்கு நேராகச் சொல்லிவிடக்கூடியவர் அவர். எம்.ஜி.ஆருக்கு எதிரே அப்படிப் பேச அனுமதிக்கப்பட்ட ஒரே நபரும் அவர்தான். அப்படிச் சொன்னதற்குக் காரணம் இருந்தது. 1971 சட்டமன்றத் தேர்தலில் திமுக அபார வெற்றி பெற்று ஆட்சியைத் தக்கவைத்த சமயம் அது. வெற்றிக்குக் காரணகர்த்தாக்களுள் ஒருவரான எம்.ஜி.ஆருக்கு அமைச்சர் பதவி நிச்சயம் என்ற எதிர்பார்ப்பு எல்லோருக்கும் இருந்தது.

வெற்றிச் செய்தி வந்தபோது எம்.ஜி.ஆர் காஷ்மீரில் ‘இதயவீணை’ வாசித்துக் கொண்டிருந்தார். தொலைபேசி மூலம் தன் விருப்பத்தை கருணாநிதியிடம் நாசூக்காகச் சொல்லிவிட்டு, தனிவிமானம் மூலம் சென்னை வந்தார். ஆனால், ‘திரைப்படத்தில் நடித்துக்கொண்டே அமைச்சராக இருப்பது சரியாக இருக்காது. அரசியல் அமைப்புச் சட்டம் ஏற்றுக்கொள்ளாது’ என்று காரணம் சொல்லப்பட்டு அவருடைய கோரிக்கை நிராகரிக்கப்பட்டது.

அமைச்சர் பதவிக்கே இத்தனை எதிர்ப்பு என்றால் முதலமைச்சர் பதவி எத்தனை முக்கியமானது. மத்திய அரசு இதை சகித்துக் கொள்ளுமா? அதிலும் பிரதமர் மொரார்ஜி தேசாய் கொஞ்சம் கெடுபிடியான மனிதர். சினிமா சங்கதிகளை எல்லாம் அவர் அனுமதிக்கவே மாட்டார். தவிரவும், அரசியல் அமைப்புச் சட்டத்துக்குச் சவால் விடக்கூடிய காரியம் இது. ஆகவே வேண்டாம்.

எம்.ஜி.ஆருக்கு நெருக்கமான எல்லோருமே கிட்டத்தட்ட இதே ரீதியில்தான் ஆலோசனை சொன்னார்கள். எல்லோருக்கும் புன்னகையை மட்டுமே பதிலாகத் தந்தார் எம்.ஜி.ஆர்.

காலை எழுந்ததும் தொலைபேசியை எடுத்து சில எண்களை சுழற்றினார் எம்.ஜி.ஆர்.

‘பேப்பர் பார்த்தீர்களா? இண்டியன் எக்ஸ்பிரஸ்?’

எதிர்முனையில் இருந்தவர் தட்டுத்தடுமாறி பேப்பரை எடுத்துப் பார்த்தார். அவர், முதல்நாள் எம்.ஜி.ஆருக்கு ஆலோசனை சொன்னவர்களுள் ஒருவர். செய்தித்தாளின்மீது வேகவேகமாகக் கண்களை அலைபாயவிட்டார். தட்டுப்பட்டது அந்தச் செய்தி.

‘மாநில முதலமைச்சராக இருந்துகொண்டு தன்னுடைய கடமைகளுக்குக் குந்தகம் வராமல் திரு. எம்.ஜி.ஆர் சினிமாவில் நடிப்பதில் தனக்கு எந்தவித ஆட்சேபணையும் இல்லை’ என்று பேட்டி கொடுத்திருந்தார் பிரதமர் மொரார்ஜி தேசாய்.

செய்தியைப் படித்த அத்தனை பேருமே அசந்துபோனார்கள். எம்.ஜி.ஆர் மீண்டும் சினிமாவில் நடிக்கிறார் என்ற செய்தி டெல்லி வரைக்கும் கேட்டிருந்தது. பத்திரிகையாளர்கள் அனைவரும் இந்த விஷயத்தைப் பற்றி எழுதி விஷயத்துக்கு தேசிய அந்தஸ்து கொடுத்திருந்தனர். பிரதமர் மொரார்ஜி தேசாயைச் சந்தித்தபோதும் இது தொடர்பான கேள்விகளை எழுப்பினர். அப்போது அவர் அளித்த பதில்தான் மேலே இருப்பது.

எப்படி நடந்தது இந்த அதிசயம்? யாருக்கும் தெரியவில்லை. படம் தொடர்பாக அடுத்தடுத்த வேலைகள் தொடங்கின. அப்போது புகழ்பெறத் தொடங்கியிருந்த இளையராஜா, இசையமைக்கப் பணிக்கப்பட்டார். மூத்த அமைச்சர் நாஞ்சில் மனோகரன் தலைமையில் படத்தின் தொடக்கவிழா ஜெகஜோதியாக நடந்தது. எம்.ஜி.ஆரின் காலில் விழுந்து ஆசிர்வாதம் வாங்கினார் இளையராஜா.

தமிழ்நாட்டில் மட்டுமல்ல. இந்தியா முழுவதிலுமே, எம்.ஜி.ஆர் ஒரு படத்தில் நடிப்பதுதான் முக்கியச் செய்தி. எம்.ஜி.ஆரின் தைரியத்தைப் பத்திரிகைகள் அனைத்தும் மாய்ந்து மாய்ந்து சிலாகித்துக்கொண்டிருந்தன. அனைத்து அரசியல் கட்சிகளையும் ஒரு கலக்கு கலக்கியது எம்.ஜி.ஆரின் அறிவிப்பு.

கருணாநிதி கொடுக்க விரும்பாத சுகாதாரத்துறையைத் தான் முதல்வரானதும் தன்வசம் வைத்துக்கொண்டு ஆட்டத்தின் முதல் காயை வெட்டினார். தற்போது முதலமைச்சர் பதவியில் இருந்துகொண்டே சினிமாவில் நடிப்பது வெட்டாட்டம்.

திடீரென எம்.ஜி.ஆரிடம் இருந்து ஒரு அறிவிப்பு வெளியானது.

‘படம் நிறுத்தப்படுகிறது.’

வட்டமடித்துக் கொண்டிருந்த அத்தனை சர்ச்சைகளும் ஒரே நொடியில் அடங்கி ஒடுங்கிவிட்டன. ‘ஏன் நிறுத்தினீர்கள்?’ என்று எவருமே கேட்கவில்லை. அவரும் சொல்லவில்லை. அதுதான் எம்.ஜி.ஆர். அவர் எடுக்கும் முடிவுக்கு அவர் மட்டுமே ராஜா. நிமிர்ந்து நிந்திக்கவும் முடியாது. குனிந்து குமுறவும் முடியாது.

முற்றிலும் புரிந்துகொள்ளமுடியாத நபர் அவர். மற்றவர்களால் கனவிலும் நினைத்துப் பார்க்கமுடியாத காரியங்களை அநாயாசமாகச் செய்து முடிக்கக்கூடியவர் அவர். ஆனாலும் எந்த நேரத்தில் என்ன முடிவு எடுப்பார் என்று எவராலும் ஊகிக்க முடியாது. ஒரு முடிவை பகிரங்கமாக எடுப்பார். பத்தே நிமிடங்களில் அதைத் தலைகீழாக மாற்றுவார். ஆனால் அவர் எந்த முடிவை எடுத்தாலும் அது சரியாகத்தான் இருக்கும் என்று நினைத்தனர் மக்கள்.

எம்.ஜி.ஆருக்குப் பல்வேறு பரிமாணங்கள் உண்டு. ரசிகர்களுக்குத் தலைவன். ஏழைகளுக்கு ரட்சகர். எதிர்க்கட்சிகளுக்கு சிம்ம சொப்பனம். படத்தயாரிப்பாளர்களுக்கு லாபதேவன். வறியவர்களுக்கு வள்ளல். தமிழ்நாட்டுப் பாட்டிகளுக்கு அவர்தான் கடவுள். இன்னும் இன்னும் நிறைய பரிமாணங்கள் எம்.ஜி.ஆர் என்ற மனிதருக்குள் புதைந்து கிடக்கின்றன. ஆச்சரியங்களாலும் சுவாரஸ்யங்களாலும் பிரமிப்புகளாலும் நிரம்பிய மனிதர் எம்.ஜி.ஆர்.

ஜெயா டிவியில் ஒளிபரப்பாகும் திரும்பிப் பார்க்கிறேன் நிகழ்ச்சியில் இந்த வாரம் ராமராஜன் இடம்பெறுகிறார். திங்கள் முலம் வெள்ளி வரை இரவு பத்து மணிக்கு. முதல் நாள் நிகழ்ச்சி பார்த்தேன். கல்கி பத்திரிகையில் இருந்தபோது சுமார் ஏழு ஆண்டுகளுக்கு முன்னால் ராமராஜனைச் சந்தித்துப் பேசியது நினைவுக்கு வந்தது.

முப்பத்து மூன்றாவது வட்டக் கழகத்தின் சார்பாக அண்ணன் அவர்களுக்கு இந்தக் கைத்தறி ஆடையை அணிவிக்… என்ற வாக்கியங்கள் ஒலிக்கும் தெருமுனைக் கூட்டங்களுக்குச் செல்வது எனக்குப் பிடித்தமான காரியம். வழக்கு, நீதிமன்ற அவமதிப்பு என்ற எந்த வார்த்தைக்கும் பயப்படாமல் மனத்தில் பட்டதைப் பளிச்சென்று பேசுவார்கள் உள்ளூர்க் கட்சிக்காரர்கள். சுவாரஸ்யமாக இருக்கும்.

சொந்த ஊரில் இருந்தபோது கட்சி வித்தியாசம் இல்லாமல் பல கூட்டங்களுக்குச் சென்றிருக்கிறேன். சென்னைக்கு வந்தபிறகு அந்த வாய்ப்புகள் கிடைப்பதில்லை. அந்தக் கவலையைப் போக்கியது கடந்த வெள்ளிக்கிழமை வளசரவாக்கத்தில் நடந்த பொதுக்கூட்டம்.

பேருந்தை விட்டு இறங்கியபோது கண்ணில் பட்டது அந்தச் சுவரொட்டி. ஜெயா அரசின் பால் விலை உயர்வு மற்றும் பேருந்துக் கட்டண உயர்வைக் கண்டித்து வளசரவாக்கம் நகர திமுக சார்பில் கூட்டம். யார் சிறப்புப் பேச்சாளர் என்று பார்த்தேன். பேராசிரியர் சுப.வீரபாண்டியன் பேசுகிறார் என்று தெரிந்தது. ஏதோ ஒரு வட்டச்செயலாளர் வரவேற்புரை ஆற்றிக் கொண்டிருந்தார். அதிகம் கூட்டமில்லை. வசதியாக ஒரு நாற்காலியைப் பிடித்து உட்கார்ந்துகொண்டேன்.

சுப.வீ பேசத் தொடங்குவதற்கு முன்னால் ஐந்தாறு பேர் பேசினார்கள். பேச வந்த ஒவ்வொருவருக்கும் ஏகப்பட்ட சால்வைகள், துண்டுகள், புத்தகங்கள். சுப.வீயை அறிமுகம் செய்துவைக்க கட்சிக்காரர் ஒருவர் வந்தார். இங்க இருக்குற எத்தன பேருக்கு வீரபாண்டியனைத் தெரியும் என்று கூட்டத்தினரைப் பார்த்துக் கேட்டார்.

அடுத்து என்ன சொல்லப்போகிறாரோ என்று நினைத்துக்கொண்டே சுப.வீயைப் பார்த்தேன். சிரித்தபடியே அந்த நபரைப் பார்த்துக் கொண்டிருந்தார். எனக்கே ஒன்ற வருஷமாத்தான் தெரியும். இங்கதான் இவரோட வூடு இருக்குதாம். உங்களுக்கு வேணும்னா இவரைத் தெரியாம இருக்கலாம், ஆனா மலேசியாவுல போய் கேட்டுப்பாருங்க.. ஈழத்துல போய் கேட்டுப்பாருங்க.. எல்லாருக்கும் தெரியும் என்று சொல்லிவிட்டு சுப.வீயைப் பேச அழைத்தார்.

மைக்கை நெருங்கும்போதே கட்சிக்காரர்கள் சூழ்ந்துகொண்டனர். சுமார் இருபதுக்கும் மேற்பட்ட சால்வைகள். மரியாதை செய்த ஒவ்வொருவருக்கும் நன்றி சொல்லத் திணறிக் கொண்டிருந்தார் சுப.வீ. மைக்கை நெருங்க விடுவார்களா என்ற சந்தேகமே வந்துவிட்டது. நல்லவேளையாக கூட்ட நிர்வாகி ஒருவரின் தலையீட்டுக்குப் பிறகு சுப.வீக்கு மைக் கிடைத்தது.

பேசுவதைப் பதிவுசெய்யலாம் என்று மொபலை எடுத்து ஆன் செய்தேன். எங்கிருந்து வந்தார் என்று தெரியவில்லை. திடீரென ஒரு குடிமகன் வந்து எனக்கு அருகில் அமர்ந்தார். மகா மட்டமான சரக்கு என்று நினைக்கிறேன். வாடை, வாட்டி வதைத்தது. குடிவெறியில் அவ்வப்போது சத்தம்போட்டு உளறினார். தளபதியை வாழ்த்தி கோஷம் எழுப்பவும் தவறவில்லை. குடிமகனின் வருகையைத் தொடர்ந்து சுப.வீயின் பேச்சைப் பதிவுசெய்யும் எண்ணத்தைக் கைவிட்டுப் பேச்சைக் கவனிக்கத் தொடங்கினேன்.

கலைஞரின் பால்ய கால நண்பர் தென்னனின் மறைவு குறித்துப் பேசத் தொடங்கினார் சுப.வீ. காரணம் இருந்தது. அந்தக் கண்டனக் கூட்டத்துக்கு டி.ஆர்.பாலுவும் வருவதாக இருந்ததாம். மறைந்த தென்னனுக்கு இறுதி மரியாதை செலுத்த பாலு திருவாரூர் சென்றுவிட்டதால் தான் மட்டும் வந்திருப்பதாகச் சொல்லிவிட்டுப் பேசத் தொடங்கினார் சுப.வீ.

விலைவாசி மற்றும் பேருந்துக் கட்டணம் பற்றித்தான் கூட்டம் என்றபோதும் முல்லைப்பெரியாறு பற்றித்தான் அதிகம் பேசினார். தமிழ்நாட்டில் ஆண்டுக்கு எவ்வளவு மழை பொழிகிறது, கேரளாவில் எவ்வளவு, சிரபுஞ்சியில் எவ்வளவு என்று புள்ளிவிவரங்களுடன் பேசியபோது கூட்டத்தில் நிசப்தம். துண்டுச்சீட்டு ஒன்றில் புள்ளிவிவரங்களை எல்லாம் குறிப்பெடுத்துக் கொண்டிருந்தார் ஒரு இளைஞர். வெள்ளை சட்டை. கறுப்பு பேண்ட். அநேகமாக வளர்ந்துவரும் வட்டச்செயலாளராக இருப்பார் என்று நினைக்கிறேன்.

கேரளாவில் தமிழர்கள் தாக்கப்படுவது பற்றிப் பேசத் தொடங்கிய போது உடன்பிறப்புகள் நிமிர்ந்து உட்கார்ந்தனர். கேரளாவுக்கு வேலைக்குச் செல்லும் தமிழ்ப்பெண்கள் மீது பாலியல் ரீதியான தாக்குதல்கள் தொடுக்கப்படுவதைக் கண்டித்தார் சுப.வீ. தமிழ்நாட்டில் மலையாளிகளின் வணிக நிறுவனங்கள் தாக்கப்படுவது பற்றியும் பேசினார். சமீபகாலமாக வருகின்ற செய்திகளைப் பார்த்தேன்; தமிழனுக்கு சொரணை வந்துவிட்டதே என்று ஆச்சரியப்பட்டேன் என்றார். அதேசமயம் வன்முறையை தான் ஆதரிக்கவில்லை என்பதையும் சொல்லத் தவறவில்லை.

தமிழர்கள் மலையாளிகள் மீது தாக்குதல் நடத்தும்போதுகூட எத்தனை கவனத்துடன் இருக்கிறார்கள் பாருங்கள்.. இங்கே சின்னச்சின்னக் கடைகளை வைத்திருப்பவர்களை எல்லாம் யாரும் அடிக்கவில்லை. தமிழனைச் சுரண்டுகின்ற பெரிய பெரிய முதலாளிகளின் நிறுவனங்களைத்தான் அடிக்கிறார்கள் என்று சொன்னபோது விசில் சத்தம். ஆலுக்காஸைப் பத்திப் பேசுங்க தலைவா என்று குரல் எழுப்பினார் ஒரு உடன்பிறப்பு. எங்களுக்குத்

தண்ணீர் கொடுக்க மறுக்கிறீர்களே, நாங்கள் நினைத்தால் என்ன நடக்கும் தெரியுமா? உங்களுக்கு சோறு கிடைக்காது. காய்கறி கிடைக்காது. பட்டினிதான். உங்கள் வாழ்க்கையே கேள்விக் குறி ஆகிவிடும் என்று எச்சரித்தபோது பலத்த கைத்தட்டல். திடீரென என் காதுக்கருகில் குறட்டைச் சத்தம். உபயம்: அருகில் அமர்ந்திருந்த குடிமகன்.

பால் விலை உயர்வு, பேருந்துக்கட்டண உயர்வு, நூலக இடமாற்றம், சமச்சீர்கல்வி, மக்கள் நலப்பணியாளர் பற்றியெல்லாம் பேசியவர் இறுதியாக தமிழகத்தில் மோசமான ஆட்சி நடப்பதை நீங்கள் ஒப்புக்கொள்வது முக்கியம் இல்லை. நான் ஒப்புக்கொள்வது முக்கியமில்லை. எல்லாவற்றையும் விட முக்கியமான ஒருவர் சமீபத்தில் ஒப்புக்கொண்டுவிட்டார். அவர்தான் விஜயகாந்த். பாருங்கள்… விஜயகாந்துக்க்க்க்கேகேகேகே.. புரிந்துவிட்டதாம், இது மோசமான ஆட்சி என்று. அப்படி என்றால் கடைக்கோடித் தமிழனுக்கும் புரிந்துவிட்டதாகத்தானே அர்த்தம் என்றார். கூட்டம் வெடித்துச் சிரித்தது!

1.    கலகம் பிறந்தது எனக்காக!

அத்வானி, நரேந்திர மோடி, சுப்ரமணியன் சுவாமி, மாயாவதி, ஜெயலலிதா போன்ற இந்தியாவின் சர்ச்சைக்குரிய பிரபலங்கள் பற்றி கல்கி வார இதழில் வெளியான தொடர். விடுபட்டவர்களையும்
புதிய நபர்களையும் இணைத்து முழுமையாக்கி, புத்தகமாக்கும் திட்டம் உள்ளது.

2.    அகம் புறம் ஐ.பி.எல்

விளையாட்டு, அரசியல், சினிமா மூன்றும் ஒன்றிணைந்த புள்ளி ஐ.பி.எல். இந்தியன் பிரிமியர் லீக்
என்ற பெயரில் இந்திய கிரிக்கெட் கட்டுப்பாட்டு வாரியம் நடத்திய பண விளையாட்டுகளை வெளிச்சத்துக்குக் கொண்டு வரும் வகையில் எழுதப்பட்ட தொடர். குமுதம் ரிப்போர்ட்டர் வாரமிருமுறை இதழில் வெளியானது. கிழக்கு பதிப்பகத்தின் சகோதரப் பதிப்பான மினிமேக்ஸ் மூலம் புத்தகமாக வெளியாகியுள்ளது.

3.    எதிரி ஜாதகம்

ஒரே சமயத்தில் சகோதரத்துவ நாடாகாவும் எதிரி நாடாகவும் இருக்கும் பாகிஸ்தானின் அரசியல் வரலாற்றைப் பதிவு செய்யும் முயற்சியே இந்தத் தொடர். 2008 மும்பை தாக்குதல் நடந்த சமயத்தில் பாகிஸ்தானின் அரசியல், ராணுவ வரலாறை ஜூனியர் விகடன் வாரமிருமுறை இதழில் எழுதினேன். இருபத்தைந்து அத்தியாங்களைக் கடந்த அந்தத் தொடர் வாசகர் மத்தியில் பரவலான வரவேற்பைப் பெற்றது. விகடன் பிரசுரம் இந்தத் தொடரைப் புத்தகமாகவும் வெளியிட்டது.

4.    கனவாகிப்போன கச்சத்தீவு

நடந்து முடிந்த நிகழ்வாக நினைக்க முடியாத, நம் உணர்வோடும் உயிரோடும் பிணைந்துள்ள ஒரு முக்கிய பிரச்னை. விஷய சேகரிப்புக்கான ஆய்வில் ஈடுபட்டபோது கச்சத்தீவு கைமாறியது பற்றிய அரசியல், சமூகப் பின்னணிகள் முழுமையாகத் தெரியவந்தன. சூரியகதிர் வார இதழில் வெளியான இத்தொடர் பிரச்னையின் ஆரம்பப்புள்ளி தொடங்கி இன்றளவும் தமிழகத்தின் தலையாயப் பிரச்னையாக நீடிக்கும் தமிழக மீனவர்கள் கடத்தல் வரையிலான நிகழ்வுகளை அலசுகிறது. இந்த அலசலை இன்னும் நீட்டித்து, புத்தக வடிவில் கொண்டுவர உள்ளேன். எதிர்வரும் சென்னை புத்தகக் கண்காட்சியில் கிடைக்கும்.

5.    க

நம் காலத்தில் அதிகம் விமரிசிக்கப்பட்ட, அதிகம் பழிக்கப்பட்ட அரசியல் தலைவர், மு. கருணாநிதி. வெறுப்புடனும் விருப்பத்துடனும் அவரை அணுகி எழுதப்பட்ட புத்தகங்களைக் கடந்து, கூடுமானவரை நடுநிலையுடன் அவரது வாழ்வையும் பணியையும் ஆராயும் முயற்சியே இந்தத் தொடர். தமிழ் பேப்பர் இணைய இதழில் கடந்த எட்டு மாதங்களாக வெளிவந்துகொண்டிருக்கும் இந்தத்தொடர், திராவிட இயக்க வரலாற்றில் கருணாநிதியின் இடத்தைத் திட்டவட்டமாகச் சுட்டிக்காட்டுகிறது. தமிழக அரசியல் வரலாற்றில் கருணாநிதியின் பங்களிப்பையும் அலசுகிறது. 2012 புத்தகக் கண்காட்சிக்குப் பிறகு இது புத்தகமாக வெளிவரும்.

6.    ஆடு.. புலி.. அரசியல்!

சுதந்தரத்துக்குப் பிறகான முக்கிய தமிழக அரசியல் நிகழ்வுகளை தகுந்த வரலாற்றுப் பின்புலத்தில் பொருத்திப் பார்க்கும்போதுதான் அதன் ஆழமும் அகலமும் முழுமையாகப் பிடிபடுகிறது. ஆடு, புலி, அரசியல் அப்படிப்பட்ட ஒரு முயற்சி. தமிழக அரசியல் வாரமிருமுறை இதழில் வெளிவரும் இந்தத் தொடர், வாசகர்களின் பாராட்டுகளையும் விமரிசனங்களையும் ஒருங்கே எதிர்கொண்டுவருகிறது. நாற்பதாவது அத்தியாயத்தை நெருங்கிக் கொண்டிருக்கிறது இந்தத் தொடர்!